احلى سندوتش فراخ جريل

احلى سندوتش فراخ جريل

المكونات

2 صدر فراخ بدون جلد او عظم مقطع شرائح 

التتبيله الخاصه بالشوى هتكون عباره عن

1 بصله

1 فلفل رومى اخضر

نصف حبه طماطم

نصف معلقه بابريكا بودره

1 معلقه مسطرده

ربع فنجان عصير ليمون

2 معلقه خل كبيره

ربع فنجان زيت زره

ملح وفلفل اسود

نصف فنجان كاتشب

5 ورقه لوره

هنضرب كل مكونات التتبيله دى مع بعضها كويس اوى فى الخلاط لحد ماتتجانس معانا وبعدين نحط فيها شرائح صدور الفراخ لمده 4 ساعات فى الثلاجه

بعد كده نبتدى نجهز

مايونيز

شرائح طماطم

شرائح خيار مخلل

عيش فرنساوى

خص كابوتشا او بلدى

ممكن كمان شرائح بصل لو بتحبيها

الطريقه

هنجيب الفراخ ونصفيها من التتبيله ونشويها على الشوايه الكهرباء او الفحم ولو مش عندك شوايه ممكن طاسه فيها شويه زيت وبعدين نسوى فيها الفراخ وعلى فكره هى مش بتاخد وقت طويل فى التسويه يعنى يدوب لونها يحمر ونبتدى نشيلها من الطاسه او من على الجريله و نعمل احلى سندوتشات لاسرتنا وبالهنا والشفا

توست اللحوم البادره

توست اللحوم البادره

المكونات

2 سلايز عيش توست براون او ابيض زى مبتحبى ويكون محمص

2 شريحه جبنه شيدر او ايدام او جوده اى نوع جبنه بتحبيه

2 اسلايز لانشون او سلامى او تركى مدخن اى نوع لحوم بادره

2 ورقه خص بلدى او كابوتشا

2 شريحه طماطم

2 شريحه خيار

1 معلقه صغيره مسطرده مع 1 معلقه صغيره زبده

الطريقه

بعد تحميص التوست هنقلب معلقه المسطرده مع الزبده كويس وهندهن بيهم شرائح التوست وبعد كده هنعمل السندوتش عادى جدا شريحه التوست ونرص الخص والخيار والطماطم وشرائح اللحوم وشرائح الجبنه ونقدمه بالهنا والشفا

كفته بانيه

كفته بانيه

المكونات

1 كيلو لحم بقرى

100 جرام بصل مفروم من غير المايه بتاعته 

ملح وفلفل اسود

1 بلح جوز الطيب مبشور

1 ربطه بقدونس مفروم

دقيق. بيض . بقسماط مطحون

دى مكونات الكفته

السندوتشات

عيش فرنساوى

مايونيز

خيار مخلل ترنشات

خص فرنساوى او كابوتشا او بلدى

طماطم حلقات

طريقه العمل للكفته

بفرم اللحمه وش واحد فى الماكينه ثم بضيف باقى المكونات وبعدين بفرم اللحمه تانى مع المكونات وش تانى فى الماكينه وبعدين بحطها فى الثلاجه لمده ساعه وبعدين بصبع الكفته صوابع وبعد كده بحطها فى الدقيق ثم البيض ثم البقسماط وبدخلها الفريزر لمده نص ساعه قبل القلى وبعدين بنقليها فى زيت غزير لحد مالونها يبقى دهبى جميل

وبعدين نبتدى نعمل منها احلى واجمل سندوتشات وبالهنا والشفا

فراخ باربكيو

فراخ باربكيو 

المكونات

نصف كيلو فراخ صدور بدون جلد او عظم مقطعه شرائح رفيعه

4 عيش تورتيلا

4 شرائح جبنه شيدر مقطعه جوليان

مكونات سلطه الكلو سلو بالريكفورد

ربع كرنبه مقطعه شرائح رفيعه جوليان

1 جزره صغير مبشوره

1 معلقه كبيره خل

1 معلقه سكر

نصف مكعب جبنه ريكفورد

نصف فنجان كريمه لبانى

هنحط الجزر والكرنب مع بعض وعليهم معلقه خل ومعلقه سكر وبعدين نجيب الجبنه ونضربها فى الخلاط مع الكريمه اللبانى لحد ماتتجانس معانا وبعد كده هنضيفها على الكرنب والجزر ونقلبها على بعض كويس ونسيبها فى الثلاجه لحد مانعمل الفراخ الباربكيو

مكونات صوص الباربكيو اللى هنتيبل بيه الفراخ

نصف فنجان كاتشب

2 معلقه كبيره هوت صوص

1 معلقه صغيره بابريكا

1 معلقه كبيره صويا صوص

ملح وفلفل اسود

1 معلقه صغيره ثوم مفروم

نصف معلقه مسطرده

1 معلقه كبيره خل

الطريقه

بعد تقطيع الفراخ هنتبلها كويس بمكونات الباربكيو اللى قلت عليها دى ونسيبها فى التتبيله دى لمده ساعه

بعد كده هنجهز طاسه فيها شويه زيت صغيرين لحد ماتسخن وبعدين هنحط الفراخ فيها مع التقليل كويس جدا لحد ماتستوى بعد كده هنجهز عيش التورتيلا ونحط فيه الفراخ وبعدين شرائح الجبنه الشيدر وكميه من الكلوسلو بالريكفورد ونقدم السندوتشات بالهنا والشفا

سندوتشات اللحم البقرى

سندوتشات اللحم البقرى

المكونات

نصف كيلو لحم بقرى مقطع جوليان رفيع جدا

3 معلقه صويا صوص

2 معلقه خل بلسمك

1 معلقه ثوم مفروم

2 بصله مقطعه جوليان شرائح

2 فلفل رومى احمر مقطع شرائح

1 معلقه بابريكا بودره

2 معلقعه زيتون مفروم فيليه

1 معلقه شطه بودره حسب رغبتك

ملح وفلفل اسود

1 معلقه زعتر بودره

زيت زيتون او زيت زره

الطريقه

فى حله على النار هنسخنها كويس جدا وبعد كده هنضيف اللحمه مع التقليب كويس جدا بعد كده هنضيف البصل والثوم مع التقليب لحد ماللحمه تبتدى تاخد اللون البنى هننزل عليها بالبابريكا والصويا والبلسمك مع التقليب كويس جدا بعد كده هنضيف الزيتون المفروم والفلفل الاحمر والشطه والزعتر ونتبل بالملح والفلفل الاسود ونسيبها 5 دقايق تانى على النار لحد ماتستوى ونكون مجهزين العيش المدهون بالمايونيز ونعمل السندوتشات ونقدمها ساخنه بالهنا والشفا

سندوتشات الكبده الاسكندرانى

سندوتشات الكبده الاسكندرانى

المكونات

نصف كيلو كبده متقطعه ترنشات صغيره

4 فص ثوم مدقوق فى الهون 

2 قرن فلفل حامى بردوه فى الهون مدقوق

1 معلقه كبيره كزبره ناشفه

1 معلقه كبيره كمون

فلفل اسود وملح

عصير 2 ليمونه كبيره

1 معلقه خل كبيره

2 فلفل رومى اخضر كبير مقطع ترنشات

معلقه صغيره شطه بودره حسب الرغبه

عيش بلدى او فرنساوى زى مابتحبى ويكون مدهون طحينه

الطريقه

بعد تقطيع الكبده بجيب طاسه وبسخنها كويس جدا وتكون حاميه بحط شويه زيت بسيطه فيها وبعد كده بنزل بالثوم المدقوق وبقلب كويس اوى وبعد كده بنزل بالكمون والكزبره وهنا انا بدات بالكمون والكزبره قبل الكبده لان ده بيعمل ريحه وطعم هايلين وبعد كده بننزل بالكبده وبلفها كويس والاهم تكون الطاسه لسه حاميه لانى عايزه الكبده مش تنزل المايه اللى فيها وبعد كده بنزل بالفلفل الحامى المدقوق وبقلب كويس اوى وبعدين الفلفل الرومى وبعدين الملح والفلفل وعصير الليمون والخل وبرفعها من ع النار وابتدى اعمل السندوتشات الجميله وبالهنا 

سندوتش جبنه بيضا بالسلامى

سندوتش خفيف جدا ولايت

سندوتش جبنه بيضا بالسلامى

المكونات

4 عيش توست شرائح محمص

ربع كيلو جبنه بيضاء

ربع كيلو شرائح بيف سلامى

معلقه زيت زيتون

نصف معلقه زعتر

خص او جرجير زى مابتحبى

الطريقه

هنجيب الجبنه البيضا ونكون مصفيين منها المايه كويس جدا بعد كده هنهرسها مع زيت الزيتون والزعتر بالشوكه كويس اوى لحد ماتبقى كريمى وبعد كده هنجيب التوست المحمص ونحط طبقه من كريمه الجبنه البيضا ثم طبقه من الخص او الجرجير وبعدين طبقه من السلامى وبعدين نحط قطعه التوست التانيه ونقدمه بالهنا